دلال وسي عبد المتعال

 عبد المتعال اتجوز دلال ..

بيحبها من وهي عيله صغيرة بضفاير كان بيعد الايام عشان يجمعهم بيت واحد🏩 ..

عبد المتعال وعد دلال وقالها هتشوفي معايا احلي عيشه هنيه يا ست البنات♥️♥️ .

ودلال كانت فرحانه ومتلهفه تشوف السعاده اللي وعدها بيها سي عبد المتعال 🫣

اتجوزوا الاتنين وعبد المتعال كان اسعد لناس 

دلال هاديه ومطيعه وبتسمع الكلام عايشه علي فد ظروف سي عبد المتعال .

عايشه وارضيه ومبسوطه وحامده ربها .

ف يوم رجع عبد المتعال البيت وهو مخضوض ووشه بهتان 

الحقيني يا دلال امي تعبانه قوي 

جريت دلال مع سي عبد المتعال  علي بيت حماتها 

لقوها تعبانه وهمدانه والحكيم عندها وقالها لازم لها راحه 

صممت دلال تقعد مع حماتها تخدمها وتداويها وتخلي بالها منها 

وفضلت معاها لحد ما خفت وبقت عال العال ..

روحت دلال بيتها وسي عبد المتعال شكرها وقالها مش هنسي ابدا وقفتك جنبي يا دلال ..

مرت عليهم مواقف كتير وكتير ودلال جدعه واقفه في ظهر سي عبد المتعال ..

ست أصيلة وقت ما بيحتاجها بيلاقيها ..

وكل عيله سي عبد المتعال من كبيرها لصغيرها بيحب دلال عشان جدعه وطيبه وصاحبه واجب وبنت اصول 

ولحد كده ماشي الحال تمام التمام 

وفي يوم وهما ع الغدا خبط الباب 

فتحت دلال 

لقيت جارتها بتقولها ..

يا دلال بسرعه الحقي جيران ابوكي بتتصلوا ويقولولك  ابوكي تعبان 🥹

اتخضت دلال ودخلت جري لسي عبد المتعال وقالته أن ابوها مريض 

قعد سي عبد المتعال يهدي دلال ويقولها هيبقي كويس متخافيش بس خلينا نروحله الصبح يا دلال انا جاي من الشغل تعبان ومش قادر 😰

بصتله دلال وسكتت وقالتله اللي تشوفه يا سي عبد المتعال 

نامت دلال ليلتها وهي حزينه وقلقانه علي ابوها ..

وجواها شويه حزن وكسرة خاطر من سي عبد المتعال ..

بس مبينتش اللي جواها وصحيت تاني يوم راحت لابوها  تشوفه..

 في الليل جالها سي عبد المتعال عند بيت ابوها وقالها 

مش هتمشي معايا بقي يا دلال انتي خلاص اطمنتي علي ابوكي وبقي كويس يلا نروح بيتنا يا دلال 

ردت دلال وقالته اسيب ابويا كده ازاي دا ملهوش غيري لازم افضل جنبه لحد ما يخف خالص يا سي عبد المتعال 

رد سي عبد المتعال وقالها ياستي ابقي تعالي بصي عليه كل يومين وبعدين الجيران هنا ناس طيبين واكيد مش هيسيبوا ابوكي لوحده يا دلال يعني قعدتك ملهاش لازمه 

ابوها قالها روحي مع جوزك يا دلال وانا خلاص بقيت احسن 

قالته لا مش هسيبك يا ابويا الا اما تبقي كويس 

اتعصب سي عبد المتعال وقالها انتي مش هتسمعي الكلام ولا ايه يا دلال 😡

قالته دا ابويا اسيبه ازاي للجيران يخدموه وانا موجوده 

قالها سي عبد المتعال انا اللي اقولك عليه تعمليه يا دلال يلا بينا علي بيتنا وابقي تعالي كل يومين بصي علي ابوكي وارجعي 

رفضت دلال وصممت تقعد مع ابوها 

غضب سي عبد المتعال وقالها اعملي حسابك انا لو مشيت مش هرجع عشان تعرفي ازاي بقي متسمعيش الكلام 

سكتت دلال وبصت في الأرض وعيونها مليانه دموع وبصت علي ابوها المريض وهو مش قادر يتحرك من السرير 

ولاول مره متسمعش كلام سي عبد المتعال 

سابها سي عبد المتعال ومشي وفضلت دلال مع ابوها تداويه وتخلي بالها منه 

بس ابوها اشتد المرض عليه واخدته دلال والجيران ع المستشفي 

وعبد المتعال مسألش فيها ولا في ابوها وصمم يعلمها الادب ويربيها 😡

عدت الايام وأبو دلال حالته في الاسوأ 

لحد ما في يوم وصل الخبر لسي عبد المتعال أن ابو دلال مات 😭😭

جري بسرعه سي عبد المتعال علي دلال يواسيها 

اول ما دلال شافته بصتله وسكتت 

قالها انا جاي اقف جنبك يا دلال 

دلال قالتله ملهوش لازمه يا سي عبد المتعال جيت متأخر 

من يوم ما اتجوزتك وانا بسمع كلامك وعايشه معاك علي المره قبل الحلوه 

كنت دائما سندك وعكازك وقت ما تحتاجني 

بس انا وقت ما احتاجتك ملقيتكش يا سي عبد المتعال 

الحب مش كلام.. الحب أفعال 

الحب مش اني الإقيك جنبي وقت ما تحتاجني 

الحب اني الإقيك جنبي وقت ما انا احتاجك

سكت سي عبد المتعال ملقاش كلام يقوله لدلال 

صممت دلال علي الطلاق 

الناس قالولها يا دلال متكبريش الموضوع عديها يا دلال ومتخربيش بيتك 

لكن دلال قالتلهم عمري ما هقدر اعيش معاه تاني 

مفيش اصعب من انك تكون سند لحد ويحسسك بالخذلان 

حاول سي عبد المتعال كتير أنه يرجع دلال 

بس هي رفضت وصممت أن كل واحد فيهم يروح في طريقه 🥹

وقالتله

الحياه اخد وعطا في كل حاجه مينفعش ابدا تعيش حياتك تاخد بس ومتديش مهما كان اللي قدامك بيحبك هيجي عليك وقت و هتلاقي رصيدك في قلبه خلص ❤️‍🩹💔

الانسان مواقف موقف واحد بس كفيل أنه يبنهي غلاوتك في قلب اللي قدامك