بيت الدلالة
كان يا ما كان في قديم الزمان
بيعش الاستاذ عبده مع مراته الست دلال وأولادهم التلاته في كوخ صغير
الست دلال كانت علي طول زهقانه من عيشيتها ومن ضيق الحال
عشان الاستاذ عبده بيشتغل وفلوسه علي القد مش مكفيه غير الاكل والشرب والضروريات
اما الست دلال كان نفسها في بيت كبير وكان نفسها تجيب ليها ولعيالها ملابس غاليه من اللي بتشوفها في السوق
وعاوزه تجيب سراير بمراتب حرير بدل السراير الخشب اللى وجعت ضهرها
أما الاستاذ عبده كان علي طول راضي وبيحمد ربه وبيقولها
"يا ست احمد ربنا احنا احسن من غيرنا ياما "
تبصله الست دلال من فوق لتحت وتقوله
احسن من مين انا عاوزه افهم دي الناس كلها احسن مننا ..
اللي عنده ارض واللي عنده بيت كبير واللي عنده بهايم ياخد من لبنها
احنا بقي عندنا ايه ؟!م
تقوليش يا اخويا احنا احسن من حد ..احنا الناس كلها احسن مننا
يبصلها الاستاذ عبده ويقولها عارفه يا دلال انتي ست زي الجوهرة بس مش ناقصه غير الرضا عارفه لو ترضي باللي ربنا كاتبهولك هنعيش اسعد الناس كلها
تبصله الست دلال وتقوله ربنا يخليك ليا يا سي عبده انا بس يا خويا نفسي ربنا يكرمنا ويوسع علينا هو يعني حرام ،،
يقولها الاستاذ عبده لا مش حرام يا دلال ارضي واحمدي ربنا وهو هيزيدك من فضله "من حمده زاده يا دلال "
وفي يوم من الايام الست دلال قالت للاستاذ عبده : انا زهقت من قاعده البيت عاوزه اشتغل واساعد معاك شويه واهو ايد علي ايد تساعد
بصلها الاستاذ عبده كده بإستغراب وقالها تشتغلي ايه يا دلال
قالت له هشتغل دلالة هروح اجيب القماش من تاجر الجمله وأدور ألف بيه علي البيوت وربنا يرزق بقي يا سي عبده
رفض الاستاذ عبده وقالها انا مش محتاج شغلك يا دلال خلي بالك انتي علي ولادك وانا مسئوليتي اصرف علي البيت
فضلت دلال تلح وتتحايل علي الاستاذ عبده
لحد مازهق من زنها ووافق اخيرا علي طلبها
بدأت دلال شغلها وبقت تلف علي البيوت تبيع القماش وبحكم شغلها بقت تدخل بيوت ياما اللي فقير واللي غني واللي عنده اراضي واللي عنده بيوت واللي عنده مواشي والتاجر
والمزارع من كل الطبقات وتشوف ستات البيوت وأحوالهم اللي عندها دهب واللي لابسه حرير واللي بيتها مليان خدم واللي عايشه في قصر وكانت بتسخط علي حياتها اكتر 😰
لحد ما في يوم من الايام راحت دلال لقصر اكبر تاجر في المدينه
وهى داخله بقت تبص يمين وشمال مبهوره من فخامه القصر وجماله لحد ما خرجت الست صاحبه القصر واستقبلت دلال
دلال عرضت كل القماش اللي معاها وعجب الست جدا واختارت منه كذا نوع
بس دلال لاحظت أن الست وشها مهموم كده ومش فرحانه
دلال سألتها وقالتلها مالك ياختي انتي مش فرحانه بالقماش ليه هو مش عاجبك
ردت الست وقالت لها بالعكس دا جميل
ردت دلال وقالت لها امال ايه اللي مزعلك
ردت الست وقالت لها عارفه يا دلال انا بشتري القماش دا ليه ؟
قلتلها دلال عشان تفصليه و تلبسيه وتتهني بيه
الست قالت لدلال هلبسه في فرح جوزي الشهر الجاي
اتخضت دلال وقالت لها يالهوي هيتجوز عليكي دا انتي قمر ملوش حق ابدا
الست قالت لها لا هو معاه حق احنا متجوزين بقالنا عشر سنين ربنا رزقني منه ببنت واحده ومريضه من يوم ما اتولدت وملهاش علاج
وانا حاولت كتير بعدها ورحت لاكتر من حكيم عشان اخلف تاني ومفيش فايده
دلال زعلت قوي واتأثرت من كلام الست وفضلت تواسيها ومبقتش عارفه تقولها ايه
دلال سابت الست ومشيت روحت بيتها عشان سي عبده قرب يرجع
رجع سي عبده من الشغل لقي دلال محضراله الاكل وقاعده وشها بشوش وتبتسم وبتخرز كمان مع ولادها علي غير عادتها
استغرب الاستاذ عبده وقعد واتغدوا
بعد الغدا قعدت دلال وقالته
عارفه يا سي عبده انا دخلت بيوت ياما اغني مننا بكتير لقيت كل بيت فيهم ناقصه حاجه مفيش حد عنده كل حاجه كامله
انا شفت كتير وسمعت كتييير وعرفت قيمه النعم اللي مكنتش حاسه بيها
انت وحنيتك عليا نعمه كبيره يا سي عبده
ولادنا نعمه ..وأنهم بصحه وكويسين دي نعمه
قعدتنا مع بعض نعمه ..ضحكتنا اللي طالعه من القلب نعمه .. بيتنا الصغير اللي حامينا من الشارع نعمه .. لمتنا مع بعض وقت الغدا دي نعمه حتي لو هنتغدي فول يا سي عبده
انت كان عندك حق احنا غرقانين في نعم ربنا بس ناقصنا الرضا 🥹
ابتسم الاستاذ عبده وقرب من دلال وخدها في حضنه وقالها وانتي ست الكل اكبر نعمه منوره بيتي
ولاول مره دلال تشوف بيتها قصر وعاشوا الاتنين في سعاده وهنا
عاشوا حياه بسيطه تنقصهم حاجات كتير. لكنها تكمل بالرضا ♥️♥️♥️♥️
تعليقات
إرسال تعليق